حوار بين باحث ماجستير وباحث دكتوراه
كنت واقف يوم في مكتبة الكلية , ودار بيني وبين باحث ماجستير الحديث الآتي بعد ما كتفه خبط في دراعي اليمين بدون قصد منه ولا مني :
باحث الماجستير : هو لو سمحت مكتبة الكلية بتقفل إمتى ؟
أنا : لما مدام سهيلة تعمل إذن مسائي والا لما تكمل يوم العمل عادي ؟
باحث الماجستير : لا لما تكمل يوم عمل عادي
أنا : حسب ما جوزها مدحت يكلمها بقا ...لو قال لها تعالي بسرعة المكتبة تقفل 7,30 م , لو قالها تعالي على مهلك المكتبة تقفل الساعة 7,36 م ..بس انت بتسأل ليه ؟ انت بعد الشر عليك باحث ؟!!
باحث الماجستير : آه باحث ماجستير
أنا : لا حول ولا قوة الا الله
باحث الماجستير : معلش دا قضاء وقدر ... وحضرتك ؟
أنا : لا أنا باحث دكتوراه
باحث الماجستير : إنا لله وإنا إليه راجعون
أنا : معلش أمر الله بقا
باحث الماجستير : انا شايفك جيبت مجموعة كتب وقعدت على المكتب اللي هناك ده ونمّت ..انت نمت بجد ؟
أنا : آه والله كنت صاحي بدري وراجع من يوم عمل شاق فجيبت الكتب ونمت عليها ...ما تقلقش انا متعود انام ع الكتب لحد ما مدام سهيلة تصحيني اقفل معاها المكتبة قبل ما تمشي ...وانا كنت شايفك قاعد عمال تنش فوق راسك حاجات صغيرة كدة ..فيه أيه مالك ؟
باحث الماجستير : لا أنا كنت باصطاد دبان عادي
أنا : هههههه انا وانا ف الماجستير كنت باصطاد ناموس في الترم الأول على فكرة
باحث الماجستير : وفي الترم التاني ؟
أنا : بقيت باصطاد دبان زيك كدة ...ولما كنت بازهق كنت اروح ارغي شوية مع مدام سهيلة ....إبنها الصغير شقي جدا ومغلبها معاه
باحث الماجستير : آه ...وائل ؟ ...ربنا يهديه يارب
أنا : وبصراحة حماتها بتعاملها وحش وجوزها على طول جي مع حماتها عليها
باحث الماجستير : حكت لي هي كذا موقف زي ده ...ومدحت بصراحة كذا مرة يغلط فيها وهي تسكت ما تردش عليه
أنا : انت عرفت ان جوزها اسمه مدحت ؟!!
باحث الماجستير : ايوة وحماتها اسمها عزيزة كمان
أنا : برافو عليك ...ونعم الباحث المجتهد ...ما قولتليش اسم الكريم ايه ؟
باحث الماجستير : عبيط
أنا : دا اسمك إنت والا لقب العيلة ؟
باحث الماجستير : لا والله عيلتنا كلها ناس عاقلة انا الوحيد اللي عبيط فيهم ورحت دفعت فلوس وضيعت عمري وصحتي في دراسة الماجستير ...أخوك في الله عبيط أوي
أنا : تشرفنا بس هههههههه ابوك اسمه اوي ؟
باحث الماجستير : اه اسمه اوي فيها حاجة دي ...انت ابوك اسمه ايه ؟
أنا : رسمي
باحث الماجستير : فهمي نظمي رسمي... يعني انت اسمك نظمي ؟!!
أنا : لا انا اسمي مجنون ...يعني اسمي الثنائي مجنون رسمي
باحث الماجستير : سبحان الله ...فكرتك بتتكلم على لقب العيلة
أنا : لا والله عيلتنا كلها ناس عاقلة انا الوحيد اللي مجنون فيهم ورحت دفعت فلوس وضيعت عمري وصحتي في دراسة الدكتوراه ...أخوك في الله مجنون رسمي لو احتجت أي حاجة في الدراسة أو المذاكرة أو كدة
باحث الماجستير : تشرفت بيك اخويا المجنون ...بس هو انت هدومك كلها تراب ليه كدة ؟
أنا : ولا حاجة كنت بانط عشان اجيب مراجع ومصادر قديمة من ع الرف اللي هناك ده ....نزلت علي دماغي المصادر كلها بالتراب اللي عليها بقيت شبه الزبالين زي ما انت شايف..لدرجة اني بقيت خايف أروح بيتنا يقابلني شيخ الزبالين يقول لي انت سيبت الشارع اللي كنت بتكنسه ورايح فين ياض؟... ...
باحث الماجستير : معلش حاول تعدي من جمب حلّاق وانت مروح
أنا : حاضر ...وانت هدومك بقت مبيضة ليه كدة ؟
باحث الماجستير : أنا قولت البس اسود عشان لو نطيت اجيب مراجع ومصادر هدومي ما تتوسخش ...نطيت جيبت مرجع لقيت اللي نازل عليا تراب لونه أبيض ....منها لله اللي شايلة شوال الدقيق فوق الكتب اللي في الرف اللي فوق
أنا : يا ابني دا مش دقيق ...دي دهارة واقعة من السقف ع الكتب من فوق ..
باحث الماجستير : تقريبا عشان بيرمموا الكلية ...انا بس خايف اعدي من جمب فرن يمسكوني ويتهموني اني باسرق دقيق والا حاجة
أنا : معلش حاول تعدي من قدام سوبر ماركت وانت مروح
باحث الماجستير : حاضر
+++
وفجأة مدام سهيلة زعقت وقالت :
الصوووووووووت
مش عايزة اسمع نفس حد في المكتبة
فاهمين ؟!!
+++
باحث الماجستير قرب مني , وهمس في ودني بخوف وقال لي :
مدام سهيلة دي معاها إعدادية ...بذمتك دا أسلوب تعامل بيه باحثين الماجستير والدكتوراه اللي في المكتبة ؟...دا احنا ولا كأننا في حضانة ياجدع
أنا : لا ياعم رسوم الحضانة أغلى بكتير من رسوم الدكتوراه , وبعدين هي بتزعق لنا بس لما تكون زعلانة ومتعكننة ....وهي شكلها متعكننة النهاردة بسبب مشكلتها مع أخوها
باحث الماجستير : سمير ؟!!...
أنا : أيوة هو ده أخوها برافو عليك
باحث الماجستير : من ساعة ما امها ماتت واخوها عامل لها مشاكل في البيت وقطعة الأرض اللي في المنصورة , حتى مرات سمير اسلوبها وحش مع مدام سهيلة
أنا : عبير ؟!
باحث الماجستير : أيوة هي دي مرات سمير برافو عليك
أنا : أمال يا ابني ...انت فاكرني بقيت باحث دكتوراه كدة بالساهل والا ايه ؟...يلا تعالا نشوف مدام سهيلة زعلانة ليه من اخوها سمير النهاردة
باحث الماجستير ( منشكحاً ) : يلا بينا
سبتمبر 23, 2025
