بنت مصر

  ياللى انتى اسمك بنت مصر وعاملة

بنت امريكا وعاملالي باربي

ورايحة جاية ع المولات وعايشة

كإنك مش جاية من حي شعبي

ولابسالي براندات .....وماركات

وعاملالي استايليش.. وحركات

ونفسك تتجوزى ممثل غربي

مبهورة اوى يا اختى بجمال طلعته ؟!

وتتمردى على الراجل المصري

بتعيبي على كرشه وعلى صلعته ؟!

.....

لو قلنا لك المصري جدع.هيصونك

تتلوى وكأنك واخدة فايروس تروجان trojan

وتتعصبي اوى ويجن جنونك

وعروقك تظهر زى هولك هوجان holk hojan

وتفضل تتمشى ظنونك ف راسك

وتدقي على الأحزان أجراسك

الراجل المصري ما بيعيبهوش

حاجة اه انتى ما تستاهليهوش

الراجل المصري دا صنع حاجات

مش فاكر ايه هى بس هي حاجات

جامدة والعالم كله بيشهد بيها

ما ينكرهاش غير واحدة زيك نبيهة

دا احلى نساء العالم يتمنوه

وعلى مطارات ومواني يستنوه

وبالأحضان والبوس يستقبلوه

ويحسسوا على صلعته بهداوة

ويزغزغوه من كرشه كمان بغباوة

وانتى هنا متبطرة ع النعمة

هاقول لك ايه مانتى مش وش نعمة

.....

خدى بالك هو ممكن يسافر

لبلد برة ويشتغل ويعافر

ويتجوز قمراية على خدها كذا وردة وغمزة

تقفى كدة جمبها تحسى ان انتى إحم لا مؤاخذة

لا تطلب منه قايمة ولا عفش ولا صالون ولا شبكة

ولا مهر ولا مواسم ولا قاعة ولا ضيوف بلا ربكة

هي دبلة وبس وفرح راقي وموسيقى هادية

لا فيها شاكوش ولا اوكا فيها عب حليم وشادية

ويتجوز ويعيش حياته صافية ورومانسية

ويبقاله مستقبل وكمان ياخد الجنسية

ويعيش باشا عنده بيزنس وبيزنسين وخمسة

يخلص كل مصالحه بضغطه على تليفونه بلمسة

وروقان باله يزيد حلاوته فيغلب برادلي كوبر

وياخده الحنين لمصر فيبكى في عيد ستة اكتوبر

ويفتكر ايامه ف مصر وسنين عذابه ويأسه

ويحسس على كرشه وصلعته ويقول لنفسه

انا بسبب مراتى الاجنبية بقيت مونبيه

لو كنت خدت مصرية كان ياترى هيحصل لى ايه ؟!

كان زمانى....احم....... لا بلاش خليني ف روقانى

انا لسه هاوجع دماغى واقول لنفسي كان زمانى ؟!

سبتمبر 23, 2025