أحبك حب مش مشروط
بعيد عن عيني ويا عيني
مع غيري ومش مبسوط
أضيع عمري يا عمري
وأحبك حب مش مشروط
كلام حلو في أغنية حلوة طبعا
ولكن للأسف
في عالم العلاقات الإنسانية
ما فيش حاجة اسمها حب مش مشروط أو حب غير مشروط
ده ممكن نسميه نزوة ..شهوة....تعلق مرضي
اعجاب لحظي.....شوقي ...فوزي...
أي حاجة تانية غير الحب
من وجهة نظري بعد علاقات مش كتير
و دروس قليلة جدا في الحياة
أي حب في الدنيا عشان نسميه حب لازم يكون مشروط
الشروط بتخلي الحب يتوجد ...يتولد... ينمو.... يزدهر
الشروط مش بس بتوجد الحب وتنميه
لأ دي كمان بتحافظ عليه وتحميه
الحب المشروط هو أساس علاقة الارتباط الواعي
حبك لغيرك لازم يكون مشروط
باقتناعه بيك ، وصدقه معاك ، واحترامه ليك ، وخوفه عليك ، وثقته فيك
لو كل ده ما اتوفرلكش في العلاقة يبقى انت لا مؤاخذة مش في علاقة حب
واستمرارك في علاقة مش حب على إنها علاقة حب
هيستنزفك شخصيا ( نفسيا وعقليا وجسديا وماليا ) واجتماعيا
ويخسرك نفسك وكل اللي حواليك وكل اللي معاك على الفاضي
اه والله
هتبقى عامل زي اللي عاش العمر يربى حمام بس نسي يقوم غية
على رأي حمزة نمرة
غية الحمام بتِمكّن الحمام من إنه يعيش ويتوالد ويتكاثر فيها
عشان يعيش فيها الحمام ويتوالد ويتكاثر
و يتحصّن من تقلبات المناخ و الأعداء والتوهان والضياع
.jpeg)
ايش تعمل العلاقة اللي مافهاش حب لواحد بيبحث عن الحب ؟
طب ممكن علاقة مش حب تتحول لعلاقة حب ؟
اه ممكن طبعا لما كل طرف في العلاقة يحط شروطه
ويحصل اتفاق بين الطرفين على كل الشروط
والتزام من كل طرف بأنه يحترم وينفذ شروط الطرف الآخر بشكل متبادل ومتعادل
ساعتها يتصحح مسار العلاقة من علاقة مش حب إلى علاقة حب
وحصلت كتير على فكرة قبل كدة
يامة متخاصمين اتصالحوا مع بعض
ويامة متقاطعين رجعوا يتواصلوا مع بعض
ويامة منفصلين رجعوا يرتبطوا ببعض
الموضوع عادي
وبيحصل على فكرة في كل زمان وكل مكان مع أشخاص كتير جدا جدا .
علاقات يامة جدا كانت متلخبطة واترتبت و كملت وبقت زي الفل
اترتبت إزاي وبأيه ؟
بمجموعة ضوابط اسمها ضوابط الحب أو قوانين الحب أو دستور الحب
اللي هي في الآخر خالص اسمها شروط الحب
إل أنا من أول الفيديو المتعب ده عمال اتكلم عليها
يعني مافيش حاجة اسمها حب مش مشروط
بالله عليك يا شيخ أرجوك
لما تحب حد خليك واضح في طلباتك وشروطك وحدودك
عشان ما تتعبش نفسك وتتعب الحد ده وتتعبنا معاك
اتفقتوا أهلا وسهلا هتبقوا مرتبطين إن شاء الله وأحباء عن قرب بالمعروف
ما اتفقتوش أهلا وسهلا هتبقوا معرفة خير إن شاء الله وأصدقاء عن بعد بالمعروف ..
وخليك راقي
أكتوبر 12, 2025
