المقامة الخيرية

حكى لنا حنفي بن تامر وقال :

مرة ساعة ضهرية / قابلت حجة خيرية / خيري ابو الخير / شافتني قالت لي : خير ؟ / فيه ايه ؟ خير يا طير ؟ / اللهم اجعله خير / قولت لها : وانا كابوس؟؟ / ماشي ..كابوس كابوس / يا ستي مقبولة منك / احتراما لسنك / ازيك ؟ انتى بخير ؟ / يا رب تكوني بخير / قالت لي : انا بخير/ والله فيك الخير / انك بتسأل عني / مع انك واطي يعني !! / انت ازيك يا ابني ؟ / ما داهية لا تكون بخير / اوعى تكون بخير / هو انا شوفتك على خير ؟ .

قولت لها : كلك ذوق / يا قليلة الذوق / ما علينا صباح الخير / ردت قالت لي : خير؟ / هيجي منين الخير ؟ / واحنا لا حيلتنا حيل / ولا فارس ولا خيل / ..والخير فنواصي الخيل / تحس اننا / واكلين رطلين بالوظة / وشاربين سطلين بوظة / اه ما بقاش عندنا / لا رجال ولا دين / بقا عندنا رجال دين / قولتلها : هه ؟ مين دول ؟ / قالت لي : ياسيدي دول / أهل التقوى والخير / اللى بينهبوا خير / بلدنا باسم الدين !! / قولتلها : قصدك مين ؟ / قالت لي : اللى عاملين / ان خيرهم لغيرهم / وان على الكل خيرهم / قولت لها : كتر خيرهم ! / قالت لي : كسر مناخيرهم ! / دول باعوا مصر بلاش / للاعداء ومجاش / من وراهم خير ! / وصلوا للحكم صدفة / قولت لها : طلاما صدفة / رب صدفة خير !! / جايز دي معرفة خير / قالت : لا لا مش خير / دي عالم بتسحل / وبتغتصب وبتقتل / وبتكذب وبتفنجر / وبتقتل وبتفجر / (خير اجناد الأرض) / دول لا لهم دين ولا عرض / ..الغدر فدمهم / ..الواحد منهم / يعمل لك فاعل خير / ويقول لك الدنيا فل / والعيشة ورد وكل / عام وانتم بخير / ويفضل يهري ويلك / وينزل ع الفيسبوك / بوستات ويقول لك شير / يلا شير في الخير / تقول له : فيه مشاكل / يقول لك : مافيش مشاكل / ما تقلبشي المواجع / دي شوية موانع / بسيطة ولعله خير / لعل المانع خير / وكل حاجة خير / يلا نشوفكم على خير / وتصبحوا على خير .

كلهم اتعموا / علشان كدة اترموا / مهو لو فيهم الخير / مكانشي رماهم الطير / مش رميناهم انا وانت / في ثورة تلاتين ستة؟ / قولتلها : اه رميناهم / من بعد ما لميناهم !! / قالت لي: دمروا مصر / ودمروا شعب مصر / عشان خاطر مصالحهم / مصر لا يمكن تسامحهم / واحنا لا يمكن نصالحهم / قولتلها :الصلح خير / يا ستى اعملي الخير / وارميه ف البحر قالت / : اسكت يا ابو عيار فالت / دة انت معندكش دم / لما انا يبقى لحم / كتافي دي من خيرك / واكل واشرب من خيرك / واحلي بفضله خيرك / والآخر اصدك / واجي عليك وضدك / أبقى أنا إنسانة / خاينة وواطية وجبانة / قولت لها : هتقوليلي؟ / من غير ما تقوليلي / انا عارف دة كويس / قالت : انت هتهيس / ف الكلام والا ايه ؟ / مالك ؟ جرالك ايه ؟ / توهت انا ف الكلام / بسرعة قوام قوام / قولت لها : مهما نعرف / برضة محدش بيعرف / الخير مع مين وفين؟ / وازاى وامتى ومنين؟ ! .

والمثل بيقول / خير فسلامة وسلامة / بخير يا ام سلامة / وتروحوا بالسلامة / وتيجوا بالسلامة / قالت لي : انت بتقول / كلام انا مش فاهماه ! / بس الشهادة لله / الناس دول مجرمين / رغم انهم رجال دين / يعنى المفروض عارفين / ان سيدنا الرسول / الف صلا عليه بيقول / : (خيركم لأهله) / (خير الناس انفعهم للناس ) ....(خير الزاد التقوى) / ..مش دة موجود ف الدين ؟ / قولت لها : هما عارفين / ان سيدنا الرسول / ألف صلا عليه بيقول / : ( خير الأسماء ما عبد وحمد ) ..( خيركم من يبدأ بالسلام ) ..(الخير في نواصي الخيل ) ...قالت لي : انا معاك / على فكرة انا موافقاك / جدا ان هما / كانوا عاملين هالومة / للأنشطة الخيرية / تقريبا يا ابنى هما / اللى أسسوا / وعملوا وهندسوا / مشروع القناطر / الخيرية بالمساطر / قولت لها : الله / قالت : سبحان الله / اللي عمروا مصر / رجعوا يدمروا مصر !! .

قولت لها : طب والعمل؟ / قالت لي : يا فندم / ربنا يقدم / اللى فيه الخير / اتفائل بالله خير / انشاء الله خير / انا فرحانة ومتفائلة / قولت لها : متفائلة / بأيه يا وش الخير ؟! / قالت لي : ببشرة خير / قولتلها : حسين الجسمي ؟ / قالت : مش قصدي الجسمي / انا قصدي قدم الخير / قولت لها : اللون الأخضر ؟ / قالت لي : لا مش قصدي / الأخضر..أنا قصدي / الراجل اللي بخيره / لسه ..الراجل اللي خيره / سابق.. وكان كافي خيره / شره ..قولت لها : باحبه / قالت لي : وانا باحبه / قولت لها : لبن بخيره / بجد طعمه جميل / جدا مالوش مثيل !

قال حنفي بن تامر : قالت لي : دة انت غبي / فيه كدة والنبي ؟!! / وفجأة سابتني ومشت / بعد أما مشت / مشيت انا اسأل نفسي / ما بيني وبين نفسي / : هي شتمتنى ليه؟! / انا عملتلها ايه ؟! / ياه ع الناس والزمن !/ بقا مش عاجبها اللبن؟ / براحتها بكرة تندم / خليها كدة عايشة / ع الذكريات وبايشة / فـ قزازة لبن سيكلم ....والختام

سبتمبر 23, 2025